ҚАЗО ДАРСЛАРИ - Шеърият - Қирғизистон - Материаллар

Бош саҳифа » Материаллар » Қирғизистон » Шеърият

ҚАЗО ДАРСЛАРИ

МУҒАННИЙ Ўш ҚАЗО ДАРСЛАРИ Бисмиллаҳир Роҳманир Роҳим Аллоҳ Таоллога Ҳамду Санолар! Пайғамбар (С.А.В.)га Саловатлар! Устозларга Саломлар! ФОТИҲА Азалий хирмондан улушим нақдир, Нафсим имонимга тушган фалақдир. Жаннатдан сурилиб келишим – ҳикмат, Йиғлаб яшаб, кулиб ўлишим Ҳақдир! БОБ У КУНда ўпишар юзимдан, Ширмой нон ёпишар сўзимдан. Орттингдан кетяпман, етолмай, Топишар борганлар изимдан! ДАРИЧА Мен Сенинг “КУН!”ингга сиғмаган Сўзинг, Ўзингга термилиб тўймаган Кўзинг. Замонлар чархида титраган Кўза, Мен Сенинг Ўзингдан Ўзинга Ўзинг! МУНОЖОТЛАР РАББИМ! Сенинг йўлинг йўлимга тушсин! Оққуш бўлиб кўлимга тушсин! Сенлигингга ишонмоқ учун, Кўзим оқиб, қўлимга тушсин! РАББИМ! Тўполону ҳам гашти бўлсам, Майхонадан тонг кишти бўлсам. Лойим қорилсаю Жамшид жомида, Байтиллоҳнинг хом ғишти бўлсам! РАББИМ! Ақлимнинг кўзлари гумоним, Кўнглимниг кўзлари ёмоним. Кўр бўлай, кўр бўлай, қўлимдан Етаклаб юрса бас, имоним. РАББИМ! Кўнглимни ўзингга буравер, Ўзинг! Ишқимнинг даврини суравер, Ўзинг! Маҳшарда гўдаклик чоғимда қолдир, Қўлимдан етаклаб юравер, Ўзинг! РАББИМ! Кўз очиб Калому Сўзингни кўрдим, Юзимнинг юзида Юзингни кўрдим. Кўнглим чаманида бир ажиб маскан, Унинг тўғрисида Ўзингни кўрдим. РАББИМ! Юзингдан Беҳиштга қандоқ бурилсам? Найлайин, ишқингга шундоқ берилсам? Саккиз жаннатингнинг завқин топарман, Кўрсаму, куйсаму, ўлсам – тирилсам... РАББИМ! Эгувчимга соқолим бор,ўзим йўқ, Ёзувчимга саволим бор, ўзим йўқ. Ўзи бору Сўзи борим – Ўзингсан, Карбалода шамолим бор, ўзим йўқ. РАББИМ! Бошим тупроғ, юзим тупроғ – кун қайда? Кун кўргани кўзим тупроғ – тун қайда? Сўзим майда, изим қайда, насим – ей, Жон Сеники, жисм тупроғ – мен қайда? РАББИМ! Карбало гаштидан ер, менга, Шаҳидлар шаштидан тер,менга, Жаннатга дахлдор бўлгани, Ҳамзанинг гўштидан бер, менга... РАББИМ! Айтдилар: “Дайр аро майдасан, Косаю ва пайдар – пайдасан.” Қонмайин шунғидим жомига, Мен чўкиб ўлдим – ай, қайдасан? РАББИМ! Пояндоз шеърларим Сўзингга, Хокандоз бу кўнгил Юзингга. “Шароби антахур” тотмаган Чавондоз етолмас Изингга... РАББИМ! Мазоринг кўчди деб, суюнтир, Шафоат либосин кийинтир. Карбало даштига қўнибмиз, Шаҳидлар қонига ивинтир... РАББИМ! Суюб, суймоқликка кучим етмайди, Каломингдан ортиқ ечим кетмайди. Иблиз ишвасидан имоним асра, Маҳшар мақомида ўчим ўтмайди. ХАЁТ ҲИҚИЧОҚЛАРИ Дарича Бу дунёнинг ишлари хўб қизиқ – қизиқ , Ёҳуларим кундан – кунга чўзиқ – чўзиқ. Адашганми, синашганми мирзоларинг Қисматимнинг кунгайлари чизиқ – чизиқ?.. РАББИМ! Балким оппоқ эдим бошланишидан, Нафсим деб, айрилиб ақлу ҳушидан, Одамнинг қонида қорайиб қолдим, Момомнинг Жаннатда қилган ишидан... РАББИМ! Алпомиш зим кетди Ултонгга ташлаб, Пиру авлиёлар чилтонга ташлаб. Тарк этди бизларни, ҳаттоки, Иблис, Қолган амалларин султонга ташлаб... РАББИМ! Дунё кўзин юмиб юмалар экан, Зулмат Оқ уйларга қамалар экан. Қучоқлаб кўришса “Дўст”, деб юрардим – Қанча қолганимни чамалар экан... РАББИМ! Дўстим суҳбатимдан тўйганмикин – а? Дунёнинг коридан куйганмикин – а? Юзлари паришон, либоси юпун – Мени арзон сотиб қўйганмикин – а? РАББИМ! Қисматимни ўйлаб кўриб, ман, Ҳайрат қозонида қайнаб турибман. Оғзимда айланган оқсақич эмас, Дўстим отган ўқин чайнаб юрибман. РАББИМ! Рафиқу рақиблар ичида ўсдим, Дўстим душманларин кўксимда тўстим. Ёрдам бериб қўйгин, сотишга – сотиб, Пулин ундиролмай юрибди дўстим... РАББИМ! Ўзимдан ортиқроқ суйган ҳам ўзим, Дўстимнинг коридан куйган ҳам ўзим. Ўқлари кўксимга тегиши аниқ – Отишга ўргатиб қўйган ҳам ўзим... РАББИМ! Дунёдан май сўрсам қон берди, Қон тутган бандангга шон берди. Дўстимга таъзиям еткизгин – Ўқлари кўксимда жон берди... РАББИМ! Киллеримнинг кўнгли ярим тўқ, Бошим узра айланмоқда ўқ. Ортга қайтиш ўқларга номус, Қўнай деса, бутун жойим йўқ... РАББИМ! Кушандам умрида хато қилмаган, Қўйнида зерикиб, зўриққан наган. Ўқлари мен учун аталган, фақат, Отишга арзирли шеър ёзилмаган... РАББИМ! Тухмат бўлди бозорим, Кўз ёшларим – хапдорим. Ёвларимни чарчатма – Тошдан бўлгай мозорим... РАББИМ! Ўзим гадоману нон танлаб қолдим, Тўкин дастурхону шон танлаб қолдим. Оқибат, юртиму уйим тўрида, Шайтонни кўрдиму шайтонлаб қолдим... РАББИМ! Таомнинг лаззати толқонда қолди, Ҳақиқат қисмати ёлғонда қолди. Дунё ташвишидан қутилмоқ душвор, Озодлик дастхати зимдонда қолди... РАББИМ! Тулпор сафоларин тойларга бердинг, Хуршид жилоларин ойларга бердинг. Мискин бандаларинг шукрини қилсин, Дунё балоларин бойларга бердинг... РАББИМ! Яхшига яхшини унаштиролмай, Омонлик оловин қалаштиролмай, Бандалар бир – бирин итдек талашар, Итлар қараб турар, яраштиролмай... РАББИМ! “У кетсин!” “Бу кетсин!” Талаблар шунча, Намойиш муддати пул тугагунча... Замона мазмуни ўзгармас асло, “Юртдан Иблис кетсин!” дейилмагунча... РАББИМ! “Фалон фалончилар ўғлиман” – десам, Юртимдан қувдилар “Тўғриман” – десам. Ўйланиб, айланиб ортимга қайтдим, Мансаб ҳам беришди, “Ўғриман!” –десам... РАББИМ! Хотинлар йўлсираб эрга айланар, Эрлари пул сўраб, ерга айланар... Чегара ҳудудлар сеҳрли диёр, Божхона итлари шерга айланар... РАББИМ! Гадонинг ҳимматин хонга тенг қилдинг, Хонларнинг неъматин қонга тенг қилдинг, Улуғлар хизмати ғассолга етгач, Гўрковлар меҳнатин шонга тенг қилдинг... ЎШ-2012 Манбъа: http://ijodkor.com
1 2 3 4 5 Рукн: Шеърият \| Қўшди: Davron (20.06.2012) \| Муаллиф: МУҒАННИЙ
Кўрилди: 1013 \| Шарҳлар: 2 \| Рейтинг: 2.0/1