Пайшанба, 19.09.2024, 22:41
| RSS

Ижодкор

Бош саҳифа | Рўйхатдан ўтиш | Кириш
Бош саҳифа » Материаллар » Қирғизистон » Шеърият
Кўзларимда нурлар ўйнайди
Раҳимжон Али
Ўш Давлат Ижтимоий Университети Жаҳон тиллари факультетитининг 1 - курс талабаси.

Раҳимжон Алижон ўғлини 7-синф ўқиётганда Жолон Мамитовдан қилган таржималари билан кашф этганман. Лекин бу кашфиёт аслида ўз даражасидаги ҳайрат бўлиб руҳимга муҳрланган. Мен умидвор инсон сифатида Раҳимжон Алини яқин ўнликларимизнинг ўзига хос ижодкори, очиқроқ айтганда замонавий қирғиз адабиётининг ўзбек тилидаги ўзбек таржимони сифатида маълум ва машҳур бўлишини жуда-жуда истардим.
Бугунги эълон қилинаётган шеърларидан мен истаган орзулар сизларга ҳам насиб бўлишини жуда ҳоҳлайман.
Юқорига кўтарилаётган инсон қадамни дастлабки зинапоялардан босиб ўтишга мажбур.
Муғанний
1-сентябр 2013 йил

***
Дунё ғами пойимда сўлган,
Хазонини териб кетади.
Юрагимнинг қовжираб қолган,
Чегараси эриб кетади.

Энди бунда дарё сувларим,
Тўлиб-тўлиб тошса бўлади.
Ғунчалаган атир гулларим,
Юзларини очса бўлади.

Лабларимда гуллар табассум,
Кўзларимда нурлар ўйнайди.
Гўдаклардай атрофда маъсум,
Қиқирлашиб ҳурлар қўймайди.

Очиб қўйдим юрак пардасин,
Топмас бўлди бу йўлда завол.
Узоқ йўлдан тойган туйғулар,
Кирса бўлар энди бемалол.

Тонг
Изғиган лашкарлар ёйилар,
Сезилмас қуёшнинг қудрати.
Кечалар нураган паллада,
Бузилар оламнинг сурати.

Эзгулик тимтишар игнада,
Тинимсиз кезишиб ҳар ённи.
Қироллар уйқудан тургунча,
Билдирмай оларлар жаҳонни.

***
Бўса олдим тонг кулгисидан,
Лабларимга қўнди табассум.
Уйғонгандек сокин уйқудан,
Мудроқ умрим шодликка маҳкум.

Гўзалликлар йиғилар аста,
Чаманлашиб тўрт томонимга.
Ғунча янглиғ кунлардан даста,
Илишарди яшил жонимга.

Уфурарди ёшликнинг ҳиди,
Яшилликка чулғаниб олам.
Қайғу-ҳасрат қувғинда энди,
Ҳайдалганди кўчага алам.

***
Дукиллаган--
ажал қадами,
юрагимдан келар...
сезаман...
Туғилдиму у менга ҳамроҳ,
Шу сафарда бирга кезаман.

Ҳайратланманг,
ажал дўстимдир,
Юрагимга жойлаб олганман.
Яшаяпмиз олис йилларки,
Бу ҳолатга кўниб қолганман.

Эҳ,
бу дўст ҳам вафодор эмас,
Нафасларим музлатиб қўяр.
Тўхтайдида - сафар сўнгида
ёлғиз ўзим кузатиб қўяр...

***
Алвастилар рақсга тушишар,
Жинлар базмин бошлайди шодон.
Бой ўғлилар увлайди сирли,
Кўршапалакка тўлади ёбон.

Табиатнинг ранглари ўчган,
Ташлаб кетган унутилган Кун.
Қандай ёмон, қандай даҳшатли,
Алвастилар йиғилган бу Тун?!

Биз-чи жимжит қоламиз дўстим,
вужудимиз уйқуга кўмиб.
Бундай "даҳшат" тунни ҳар куни,
ўтказяпмиз кўзимиз юмиб.

Эртак
Тош ёғсаю осмондан,
Тошлар тошга тушсая.
Ачиниб йиғлай десам,
Ёш қолмаса-я дунёда?!

Шамшир шир-шир айланса,
Товланиб теваракда.
Кесай деса тик турган,
Бош қолмаса-я дунёда?!

Бу умр нима бўлди,
Чала қолдими бари,
Ошай десам ошлагани
Ош қолмаса-я дунёда?!

***
Япроқлар юзини ювдилар,
Энтикиб-энтикиб нафаси.
Юракдан аламни қувдилар,
Буздилар қайғулар қафасин.

Ўзим ҳам сиғмаган ўзимга,
Дунёлар тўлқини оқдилар.
Энди ҳар босганим изимдан,
Табассум суратин тақдилар.

Ёмғирга айланган вужудим,
Тупроққа дўнишни излади.
Заминдан гиёҳдек кўкка жим,
Талпиниб яшашни истади.

***
Йиғи келмас юрагимда тош,
Ёш томмайди - саҳро кўзимдан.
Кунлар ўтар боқиб тобора,
Шубҳаланиб боргум ўзимдан.

Ишқ дедиму,
ишққа етдимми?
Саждаларда йиғлаёлмадим.
Тутаб кетар хаёлотларим,
Фикрларим чўғлаёлмадим.

Тўлиб кетган вужудимга тош
чидолмадим,
ишим битмади.
Ўхшатганим мағрур кўксимга -
санчган эдим пичоқ ўтмади.




Рукн: Шеърият | Қўшди: Davron (06.09.2013) | Муаллиф: Раҳимжон АЛИ
Кўрилди: 851 | Шарҳлар: 2 | Рейтинг: 1.0/1

Шарҳлар: 2

0  
1 Elmurodjon   (06.09.2013 14:46) [Материал]
Раҳимжон, "Тонг" сарлавҳали шеърингизни бўлажак китобингиз учун ажратиб қўйинг:))). Биринчи китобчангизга киритиш мумкин бўлган энг биринчи шеър билан табриклайман.
"Эртак" сарлавҳали шеърингизни яна қайта ишлаб, мукаммаллаштирсангиз тўпламингиздаги иккинчи шеър бўлиши мумкин. Шундай шеърлардан яна қирқтагина бўлса, биринчи китобчангиз тайёр. Бўш келманг!!! Омад!!!
Эҳтиром ила Элмурод Жусупалиев.
0  
2 Rahimjon   (08.09.2013 15:16) [Материал]
Эътиборингиз учун раҳмат! Худо ҳоҳлаб насиб қилса биринчи китобим шундай шеърлардан иборат бўлса, илк китоб учун тақризни сиздан кутиб қоламан! Омад ёр бўлсин!
Шарҳни фақат рўйхатдан ўтган фойдаланувчилар қолдира олади.
[ Рўйхатдан ўтиш | Кириш ]
Меню
Рукунлар
Кириш формаси
Ихчам-чат
Статистика
Жами on-line: 2
Мехмонлар: 2
Фойдаланувчилар: 0
Ijodkor.com © 2012 - 2024