Муғаннийни алдаш осон...
МУҒАННИЙ
Муғаннийни алдаш осон...
Ёр, кўкдаги ой бўлсанг ҳам қайтиб тушасан,
Муғаннийни алдаш осон – унутмоқ мушкул!..
Юлдузларга юз баҳона айтиб тушасан,
Муғаннийни алдаш осон – унутмоқ мушкул!..
Оқ буранинг бўйларида изларим қийнар,
Кўзларингда қотиб қолган юзларим қийнар,
Қулоғингда ётиб қолган сўзларим қийнар,
Муғаннийни алдаш осон – унутмоқ мушкул!..
Хаёлларим ўйларингни қирқиб қочади,
Руҳим таниб, бевафо деб, қўрқиб қочади,
Кўзларингдан бир томчи ёш қалқиб қочади,
Муғаннийни алдаш осон – унутмоқ мушкул!..
Ким ҳам сени юпатарди мунгли чоғларда,
Мен тураман мужгонларинг мунчоқларида,
Ёт сирайсан ёргинангнинг қучоқларида,
Муғаннийни алдаш осон – унутмоқ мушкул!..
Тушларимда исмим айтиб алаҳсирайсан,
Ёнингдаги ёринг ётиб, ёстиқ силайсан,
Тонг отгунча рўмолингни сувга чилайсан,
Муғаннийни алдаш осон – унутмоқ мушкул!..
Севмайман деб ўз-ўзингни алдаб ўтарсан,
Алдаб ўтган кунларингни қарғаб ўтарсан,
Хатларимни ҳилватларда сақлаб ўтарсан,
Муғаннийни алдаш осон – унутмоқ мушкул!..
|
| Рукн: Шеърият | Қўшди: Rahimjon (12.07.2013)
| Муаллиф: МУҒАННИЙ
|
| Кўрилди: 828 | Шарҳлар: 1
| Рейтинг: 0.0/0 |
Шарҳлар: 1 | |
|
0  
Илк бор ушбу шеърни устознинг оғизларидан эшитганимда қаттиқ таъсирланиб кетгандим. Шеър ўқилиши ҳам, айтилиши ҳам таъсирли бўлганди ўшанда...
|
|
|
|
|
Статистика
Жами on-line: 1 Мехмонлар: 1 Фойдаланувчилар: 0
|
