Мухаббат азалий мавзу...Хижрон ва Висол кунгилларнинг севимли кушиги...

Беҳзод ФАЗЛИДДИН

Руҳим чинқиради, мендан тонади,
Уйғониб кетади яна орларим.
Бўғзимни куйдириб сўзлар ёнади,
Қачон туғилади менинг шеърларим?

Минг-минг йилдан бери турибди яшнаб,
Ишонса бўлади илдизларимга.
Сўниб бораяпти ўзимга ўхшаб,
Ота, нима бўлди юллдизларимга?

Бугун сахардан бери ҳаёлимда бир мисра айлана бошлади... Ёмғир куйи эса бу оҳангга жўр бўлмоқда... Ўзимча қайта- қайта "ёмғир ёғар, шиғалаб ёғар, томчилар томчилар сочимга... ёмғир ёғар, шиғалаб ёғар" дея пичирлайман. Ниҳоят ишга келгач, бу ажойиб куйни сизга ҳам илиндим....

Паҳлавон СОДИҚ

Мен келдим, сен мени унутган
Ташлаб кетган жойда турибман, мана.
Эсласанг, ўртадан бир дарё ўтган...

Мана, биз бағирни берган кўк майса,
Табиий, у энди бошқа кўкарган.
Балки бағримизни кўтарган бошга!..

Муслим МУСАЛЛАМ

***
Тақдирлар тақдирга омонат экан,
Нигоҳларо нигоҳга кетаркан эриб.
Шу бугун эришган соҳир лаҳзалар
Эртага кетаркан соғинчин бериб.

Дунёлар дунёдан олар имтиҳон,
Кўнгилни четидан ўчиб кетар доғ.
Одамнинг умрига ўхшаб кетаркан,
Ярми яшил, ярми сапсариқ япроқ.

Рислиғой ҲОТАМОВА
Бугун ажойиб Шоир, устозим ва опам Рислиғой Ҳотамованинг туғилган куни! Афсуски биримиз Ўшда биримиз Шошдамиз. Шунинг учун учрашишнинг иложи йўқ. Аммо, шундай бўлсада барча яхши ниятларим ва дуоларим Сиз учун опа!
Рислиғой Ҳотамова шеърлари билан танишинг!


Кулгучимга ботиб кетган, кулгуларим,
Кипригимдан ўтолмаган уйқуларим.
Беозорим яраланган оҳуларим,
Йиғлаётган орзуларим.

Сариқ япроқ юзингизни рангимиди,
Ҳасратингиз юрагимнинг зангимиди,
Мозорингиз мен шўрликнинг бағримиди,
Йиғлаётган орзуларим.

Бермагайман, сизни армон қўлларига,
Куй бўласиз, бахтнинг бийрон тилларида,
Йўллагайман, сизни жаннат йўлларига,
Йиғлаётган орзуларим.

Улуғбек ҲАМДАМ

Йиллар ўтаверар,
Ўтаверар йиллар...
Юракка ўтмишдан сувратлар солиб.
Биз эса лабларда истеҳзо,
Шунчаки кўз ташлаб ўтирганнамо
Варақлаймиз ўз қалбимизни...
Йиллар эса ўтаверар,
Ўтаверар йиллар.
Улар бизга чиндан бепарво...

Фахриёр

Шеър ёзгиси келар одамнинг
тўйиб-тўйиб, кун қатораси.
Гурсиллайди юрак қадами,
лекин кўринмайди қораси

бир манзилинг – бўлмайди қойим.
Ҳамма нарса сарғайган – хазон...
Куз тонгида қаноти шойи
Зоғлар тинмай айтади азон.

Бобораҳим МАШРАБ

Бу тани хокинию руҳи равонни на қилай?!
Бўлмаса қошимда жонона, бу жонни на қилай?!

Ёрсиз ҳам бодасиз маккага бормоқ не керак?
Иброҳимдин қолған ул эски дўконни на қилай?!

Урайинму бошима саккиз биҳишти дўзахин,
Бўлмаса васли менга, икки жаҳонни на қилай?!

Иқбол МИРЗО

Қайдан келаётир уюр-уюр ғам,
Қайдан кўчаётир палахса ҳасрат?
Қайдан ёғаётир ширғоқдек алам,
Қайдан сизаётир лахта-лахта дард?

“Милт” этган шуъла йўқ, “йилт” этган учқун,
Ваҳима сузади баҳри муҳитда.
Оғриган чол каби руҳият тушкун,
Ўлимни кутгандек оғир сукутда.