Комил МАЖИД

Баридан чарчадим, азизам.
Баридан холисан бир ўзинг,
Бир марта йўқотдим чинданам,
Бир марта силамай гул юзинг.

Соғиниб боряпман тўкилиб.
Тоқатнинг тоғидан ҳатлайман.
Бир умр кўзинга тикилиб,
Соғинчдан тўкилмоқ истайман.

***

БОБУР
Болаликда бергандим кўнгил,
Заҳри қолди танамда минг йил.

Мен, шубҳасиз, парчаланаман, -
шундай тугар буюк хизматим.
Кимга, кўзим, кимга пешонам,
кимга тегар қизиқ қисматим.

Ғалаёнга тўла вужуддан
охир дунё бўладир халос.
Ер остига кириб кетарман
барча мўмин бандаларга хос...

Умримни ўткинчи сабога бердим,
Энг сўнгги чақамни гадога бердим,
Бу телба руҳимни Худога бердим...

Сабо олиб борди, гадога берди
Гадо йиғлаб борди, Худога берди.
Худо мени сенга хатога берди,

Сен мени кимларга бердинг, Азизим?

Комил МАЖИД

Бу ишқ қалбим ардоғидан таралган нур,
Бу ишқ қалбим даргоҳидан топилган дур.
Ватан ишқи юрагимда сўнмас сурур,
Ватан дарди қалбда мангу муҳаббатдир.

Рауф ПАРФИ

ЁШЛИК ЗАНГОР ФАСЛ. КЕЧДИ, САРҒАРДИ,

Тўкилди у. Шафқат билмас баргрезон.

Қора совуқларга отиб юборди,

Шамоллар пойида синмоқда хазон.

Ёшлик зангор фасл. Кечди. Сарғарди.

ҚУТЛИБЕКА
Тилимланди, Ой яна тўлди,
Не савдолар кўрди ҳар тилим?!
Қалбимда кўп истаклар ўлди,
Мени қаттиқ севгин, севгилим.

Баҳор тутиб яшил байроқлар
Тикланишга чорлар улусни.
Қарсиллатиб ёзар чақмоқлар
Булут шунча гизлаган сўзни.

Абдували ҚУТБИДДИН

Хийла кеч тушибди севайлик десак,
Ўғри оралабди боғу равона.
Чиннидай рўёдан эшитдик — чўпчак,
Хийла бегонамиз, билсак, жаҳона.

Кексайиб кетибди тунлар биз учун,
Тақса ярқирамас эски тақинчоқ.
Хийла бекорларга яшайман маҳзун,
Хийла овунчимга сен бир ўйинчоқ.

Муслим МУСАЛЛАМ

Кет дединг тишимни тишимга босдим ,
Палтойим узатдинг нафрат билан сўнг.
Шамол эшикларни қарсиллаб ёпди,
Билдим тақдиримиз ҳеч келмади ўнг.