АБДУЛҲАҚ

Кўзларинг домига илиндим, Зебо,
Оҳ, на қадар теран, на қадар чуқур.
Бундан қутулмоқлик мушкулдир, аммо
Қутулмоқ истамас хаёлим – учқур.

Элмурод ЮСУФ

Даврон Ҳотам, Абдул Ҳамид, Зоҳид Жон ва Раҳимжон Алижон ўғли шеърларига пародиялар.

Раҳимжон Алижон ўғли
Туғилмасдан бошқача эдим,
Барча иллат менга етти ёт.
Ваъда бердим юрагимга мен:
“Киролмайди бағримга ҳаёт!”

Алишер СОИПОВ
Лекин сиз чекманг ҳеч беҳуда ташвиш,
Умрим якунининг сабаби сизмас.
Юртдошлар ўлимим қилсалар тафтиш,
Изоҳлари эрксиз ватанга сиғмас.

Даврон ҲОТАМ

Гоҳ кўнглим қолади сендан,
Юз буриб кетаман
Қаландар мисол
Лек Машраб чиқмайди мендан.

Абул Ҳамид

Қишлоқ яхши – ҳовли супурасан,
Райҳон иси тўлар айвонга,
Сув сепасан, - деди Лола.
-Тонгда туриб сигир соғасан,
Тандирга ёпасан
Ёғли патирлар, - тамшанди Раъно.
- Ўз-ўзингни эринг бўлар,- деди иккиси...

Йўлдош Али АБДУЛЛОҲ

Кундуз рангин рўмолин
Кечанинг бошига ташлади.
Самонинг ҳар, ҳар еридан учқунлар
сачради.
Тердим...
Тера бошладим.
Ва ниҳоят адашиб кетдим.

Зоҳиджон

Дил уйини қоплади ғамлар,
Бу қайғули дунёдан тўйдим.
Ўтаверинг қоши қаламлар
Муҳаббатга ишонмай қўйдим.

Даврон ҲОТАМ
Пичирлаб-пичирлаб қўяман.
Индаманг.
Сўзларни лабимда сўяман,
Қонидан сиз хино қўясиз.

Кўзларим ёшлари сохтадир,
Йиғламанг.
Бошимни урганим пахтадир.
Ҳар ҳолда сиз бахтли бўласиз.

Авлиёхон ЭШОН

Кўксимга сездирмай кирган оққушлар
Кўзлар косасида элтадилар сув.
Оппоқ булутларни кийган юрагим,
Соғинч дарёсида юзларингни юв,
--Муҳаббат келмоқда,
муҳаббат—Сулув.

Шафақранг қадаҳга чўмилган булбул
Оқшомгул баргидан ёзар дастурхон.
Шамоллар силкитган кўк дарахтининг
Тилло сандиғидан тўкилади дон,
-- Муҳаббат келмоқда,
муҳаббат—Дармон.